دليل :كيف تعرف الشخص الفلسطيني من بين سكان العالم ؟؟
* أكثر إنسان عنده عضلات قد ما ولاده أكلو منه قتل .
* يتكلم بصوت عالي في المكالمة الدولية منشان التاني يسمعه.
* بيحتفظ بأكياس محلات اللبس والأحذية وورق الهدايا تحت فرشة التخت لسنوات .
*عنده صينية مكسرات مقسمة لتلات او أربع أقسام منشان المزاج لكن لايستخدمهاابدا.
*بيشتري قبل الإفطار في رمضان مواد استهلاكية متوفرة عنده في البيت .
* أول ما يشوف منظر طبيعي وزرع وخضار بصير يحكي بينه وبين حاله ( بدها هش ونش ) .
* بيتخانق ساعة دفع الحساب بحرارة شديدة على إنه هو اللي لازم يدفع.
*بيطفي سيجارتو بفنجان القهوة مع انو في منفضة على الطاولة .
* دايما بدور على الاشي الكويس والرخيص وابن الناس وبموت في اشي اسمه " لقـــطة "
* بفهم بالسياسة ورأيو دايما هو المزبوط وكل العالم خونة والقضية باعوها وقبضو حقها.
* دائما يعيش ضمن الحلم ولا يقبل بان يخرج مما يحلم.
* دايما بوصي اولاده " اوعى الناس تضحك عليك .. واكيد طول انهاره بذل اولاده
وبقولهم شوف ابن فلان احسن منك وعامل مقارنة بينهم وجايب لولاده احباط.
* بتفوت عنده في المطبخ راح تلاقي " تنكة زيت زيتون" , " نصية جبنة " ,
" تنكة زتون غير المراتبين اللي فيها زتون " بالاضافة للاعشاب
هاي " زعتر نوعين عالاقل , ميرامية
وبكون حاططهم في خيشه , انواع متفرقة من الاعشاب " لكي
يمارس الطب فيها على البشر.
* اكلاته المفضلة " قلاية البندورة" واكيد لازم يدعي انه مافي حدى بيعرف يعملها زيوو
ودائما بيفتخر فيها وبيفتخر في قرنين الفلفل اللي بيحطهم عليها
وبضل يحكي عنهم قديش بيحرقو وتعتبر من الاكلات اللي بتناسب جميع الأوقات وكل
الاماكن يعني ممكن يفطر او يتعشى او يتغدى عليها كلو بصير مع قلاية البندورة
لامستحيل ابدا, طبعا بالاضافة للاكلات الاخرى زي المجدرة , شوربة العدس وطبعا بيحاول
يفهم اولاده دايما على السفرة قديش هي مفيدة واذا واحد رد عليه وقلو اللحمة يابه
كمان مفيده بظربه قتله وبقوله قوم عن السفرة على اساس انه طارده من على سدر منسف
واكيد اخوانه بصيرو يطلعو عليه وبستجريش حدا يحكي مرة ثانية على الاكل انو مش زاكي.
* "قتلة الاولاد ماقبل النوم" هي بمثابة قصة ماقبل النوم عند الشعوب الاخرى
لان القتل قبل النوم هو اسهل وسيلة فعالة للنوم السريع علشان هيك بس يكبرو
اولاده بتمسحو وببطلو يحسو بالقتل اللي بوكلوه وطبعا لازم هو ومرتو يفتخرو
قدام الناس ويحكو عن القتلة اللي الاب طعماها لابنو والمصيبة
انو الابن بكون بسمع ومبسوط انهم بحكو عنو .
* كل مايشوف محل شغال كويس بصير يحسب للمحل قديش بطلع في الشهر
واكيد تراوده " في احلام اليقضه " فكرة انو بدو يفتح محل وبدو يعمل مشروع
كل ماشاف واحد صار معاه شوية مصاري وبضل طول عمره يحلم ويفكر قي هالاشي
ولاكن تبقي كلها في احلام اليقضة تتوارثها الاجيال جيل بعد جيل
* لازم كل مايروح اجازة على الاردن او يمر منها يروح على مطعم هاشم وعلى
حلويات حبيبة اللي في وسط البلد اعتقادا منه انه همه تحديدا احسن ناس
بتعمل اكل وعلشان بس يطلع من الاردن يحكي اني رحت.
* طبعا في المجلس دائما بتكلم عن الفرص اللي صحتلو زي قطعة الارض
اللي نعرضت عليه قبل عشر سنين وكان سعر المتر دينار وهسة سعر المتر 5000 دينار
وانو نعرض عليه جبل كامل بعشرين ليرة بس هو ما رضي فيه وهسة طبعا
الجبل هادا هو بكون الجبيهة والا عبدون والا الشميساني .
شوووو..فلسطيني ولا لأ..؟؟
مواضيع لم يُرد عليها
facebook
أفضل 20عضو
أفضل اعضاء اليوم
جديد المواضيع
مشـــــاركاتي
قوانين المنتدى
التسجيل
